सुप्रसिद्ध संगीतकार नरेंद्र भिडे यांचे निधन...आगामी सरसेनापती हंबीरराव ठरला शेवटचा चित्रपट


सुप्रसिद्ध संगीतकार नरेंद्र भिडे यांचे निधन...आगामी सरसेनापती हंबीरराव ठरला शेवटचा चित्रपट

मिलिंद शेंडगे

पुणे – सुप्रसिद्ध संगीतकार नरेंद्र भिडे ह्यांचे आज (ता.१०) रोजी पहाटे हृदयविकाराच्या धक्क्याने दुखःद निधन झाले आहे. ते ४७ वर्षांचे होते. अंत्यदर्शन सकाळी ९:३० वाजता डॉन स्टुडिओ, कर्वे नगर, पुणे इथे आणि सकाळी ११ वाजता वैकुंठ स्मशानभूमी येथे अंत्यसंस्कार होणार आहेत. भिडे यांच्या पश्चात आई, वडील, पत्नी आणि दोन मुले आहेत. 

       सिव्हिल इंजिनियरची पदवी घेतलेल्या संगीतकार नरेंद्र भिडे यांनी अनेक नाटक, मालिका, मराठी चित्रपट संगीतबद्ध केले आहेत. त्यांनी भारतीय शास्त्रीय संगीताचे शिक्षण उस्ताद महंमद हुसेन खान साहेब, स्वरराज छोटा गंधर्व, बाळासाहेब मते, शैला दातार, सुधीर दातार, सुहास दातार यांच्याकडे तर पाश्चिमात्य संगीताचे शिक्षण हेमंत गोडबोले यांच्याकडे घेतले. त्यांनी अनेक नाटक, मालिका, चित्रपट, जिंगल्सच्या माध्यमातून संगीतक्षेत्रात आपली स्वतंत्र ओळख निर्माण केली होती. त्यांना झी गौरव (पाच वेळा), सह्याद्री सिने अवॉर्ड,  राज्य नाट्य पुरस्कार ( दोन वेळा), व्ही. शांताराम पुरस्कार, श्रीकांत ठाकरे पुरस्कार, म. टा. सन्मान, राज्य चित्रपट पुरस्कार आदि विविध पुरस्काराने सन्मानित करण्यात आले होते. नरेंद्र भिडे यांनी आपल्या सांगितिक कारकिर्दीत सरसेनापती हंबीरराव (आगामी), मुळशी पॅटर्न, रानभूल, त्या रात्री पाऊस होता, हिप हिप हुर्रे,  पाऊलवाट, अनुमती, दिल ए नादान (बायोस्कोप), देऊळ बंद, कलम ३०२, साने गुरुजी, शासन सिंहासन, चौदहवी का चाँद, आंधळी कोशिंबीर, आघात, शेवरी, रमा माधव, एलिझाबेथ एकादशी, यशवंतराव चव्हाण, हरिश्चंद्राची फॅक्टरी,  मालक, मसाला, समुद्र, चाँद फिर निकला (हिन्दी) याशिवाय श्वास, सरीवर सरी, माती माय सह अनेक चित्रपटांना पार्श्वसंगीत दिले तर कोण म्हणतं टक्का दिला?, माकडाच्या हाती शॅम्पेन, काटकोन त्रिकोण, चिरंजीव आईस, चांदणे शिंपीत जा, हमीदाबाईची कोठी, जोडी तुझी माझी, एक झुंज वाऱ्याशी, गोडी गुलाबी, फायनल ड्राफ्ट, लव्ह बर्डस, व्हाईट लिली अँड नाईट रायडर, अलीबाबा आणि ४० चोर, छापा काटा, आषाढातील एक दिवस, संगीत गर्वनिर्वाण इ. नाटकांना व अवंतिका, ऊन पाऊस, साळसुद, घरकुल, मानो या ना मानो, पळसाला पाने पाच, भूमिका, पेशवाई, नूपुर, अबोली, श्रावण सरी, सुर – ताल, कॉमेडी डॉट कॉम, फुकट घेतला शाम, अमर प्रेम इ. मालिकांना संगीतबद्ध केले.

      त्यांच्या अचानक जाण्याने संगीत क्षेत्रात हळहळ व्यक्त करण्यात येत आहे व प्रत्येकाच्या मनात एक सूर हरवल्याची भावना निर्माण होत आहे.

जाहिरात
Search
विडिओ
Recent News